Zimanê Dayikê
Ev helbest diyarî zimanê dayika kurdî û qurbaniyên erdhejê ye
Roja Cîhanî ya Zimanê Dayikê li tevaya gelan pîroz be.
Ev helbest diyarî zimanê dayika kurdî û qurbaniyên erdhejê ye.
KULA BI SER DERDAN DE
Hawar û sed nal û girî
Dil sotî ye venamire
Can ketye ber çerxa kulan
Azar û êş jê nagere
Jîna dilovan kûve çû
Aramiya dil daye dû
Ew jîngeha dilpak û şên
Tev bûye leylan ar û dû
Gava tewankar bûne yek
Talan kirin vîn û evîn
Jîngeh ji bo me bû neyar
Piştî ku jîn kuştin bi kîn
Wêran kirin şarê me tev
Talan kirin çol û zevî
Bumbarduman û agiran
Dan ber xwe tev dar û devî
Piştî evan derdan tevan
Hêrsa xuristê pêl vedan
Feryad û sed ax û hewar
Herder ruxandin erdhejan
Lerzîn û hêrsa jîngehê
Bajar û gund kavil kirin
Talan kirin hêvî û xewn
Can û kezeb tev dil birin
Cindêrisa cê sorgulan
Bû kaniya êşa welat
Derdê berê têrê nekir
Erdhej jî hat bû bobelat
Vê erdhejê em qir kirin
Can û ceger j’me dûr kirin
Tev zar û zêç xwişk û bira
Dayik û bav tevda birin
Dijmin pirr in bê mehder in
Talanker û kuştinker in
Erdhej jî bo wan bû heval
Wêranî bê ser û ber in
Wêran kirin malên me tev
Tev bûn xwelî xan û sera
Bin kavilan man pakrewan
Keç bang dike bav û bira
Bê mehder û şefqet bi kîn
Tev şîrmijan tov tev birrîn
Kî kare êşê sar bike
Em bûne goyînê girîn
Hawar dikin bersiv tune
Dê kî bi gazya kê ve bê
Xizm û mirov tev derdser in
Ma kî heye bêje libê
Xêrxwaziya Barzanî hat
Kurdayetî’l Efrîn vejand
Hin dilxweşî xiste dilan
Xwîna birayetî keland
Çawa birîn derman bibin?
Derd û felaket mezin in
Ma dê gelê bêçar çike
Bin çûne jor û jor bin in
Hawar û sed nal û girî
Dil sotî ye venamire
Can ketye ber çerxa kulan
Azar û êş jê nagere
Şiyar Silêman
19/02/2023
